Ֆեյսբուքյան լրահոսս ՎԱՆՈ Է ԳՈՎՈՒՄ և Վանոյի կեղծ ինտելեկտուալ մտքերը պարունակող մեջբերումներն է հիշեցնում, որոնք, երբ խորանում ես դրանց իրական բնույթի մեջ, փքուն աստառով ընդամենը ՍՆԱՄԵՋ ԴԱՏԱՐԿՈՒԹՅՈՒՆՆԵՐ ԵՆ: Իրոք այն իրավիճակն է, երբ ասում են, թե, եթե ուզում ես մտքերդ տարածվեն, անորոշ ցինիզմով համեմված ծաղրիր համընդհանուր ընդունված արժեքները: Ինչքան անորոշ, այնքան լավ, մարդիկ չեն հասկանա, իսկ դա պատրանք կստեղծի, թե խելոք բան ես ասում: Եվ ստեղծվում են լեգենդներ և ուռճացվում են հերթական կեղծ արժեքները…
Իսկ իրական կյանքում կար ոչնչից մի քանի տարում ամենազոր գերնախարարի աստիճանի հասած ընդամենը մի ՄԻՋԱԿՈՒԹՅՈՒՆ, որը գլխապտույտ էր ապրել իր այդ կարգավիճակից և, չգիտակցելով ու չգնահատելով իր նոր այդ դերը, ընկել էր ցինիզմի գիրկը: Ու դեռ չեմ խոսում հանցավոր այն խմբի մասին, որը գործում էր նույն Վանոյի բարձր հովանու ներքո, քանզի, առանց դրա էլ, Վանոն ԿԱՆԳՆԱԾ Է ԲՈԼՈՐ ԱՅՆ ԱՅԼԱՆԴԱԿՈՒԹՅՈՒՆՆԵՐԻ ՀԻՄՔՈՒՄ, որոնք ընդհուպ մինչև մեր օրերը հետագայում տեսանք Հայաստանի Երրորդ Հանրապետությունում՝ ընտրակեղծիք, ցինիզմ, օլիգարխիա, իշխանական բեսպրեդել, հաբռգածություն, ազգայինի ոտնահարում, անձնական հարստացում ու շատ նման այլ բաներ…
Բա ամենազոր իշխանություն էիր, Վանո, ՀՈՂԸ ԽԱԲԱՐ ՉՏԱ, բա նորաստեղծ անկախ պետության հիմքում էիր կանգնած, բա ՈՒՂՂԵԻՐ, ԿԱՐԳԻ ԳՑԵԻՐ ԵՐԿԻՐԸ, այլ ոչ թե հաբռգեիր և շուջբոլորդ ցինիզմ տարածեիր, հետո էլ հեգնեիր ու դատարկ մտքեր արտահայտեիր, որոնց հիմնական իմաստը հայերին արժեզրկել էր: Բա անեիր, Վանո, բայց չարեցիր՝ գերադասելով կուրացված հաբռգվածությունը:
Վանոն արբել էր ամենաիշխանությունից, իսկ հետո այդ կարգավիճակին վերջ տրվեց ու Վանոն կորավ: Մնաց լեգենդը, իսկ ավելի շուտ՝ ոմանց կողմից ուռճացվող ԿԵՂԾ լեգենդը, որը կազմում էր «Լևոն Տեր-Պետրոսյան» ավելի մեծ լեգենդի մի մասը: Քաղաքական գործչին պետք է գնահատել իր թողած ժառանգությամբ՝ ի՞նչ է Վանոն թողել իրենից հետո…
Գնահատականս համարեք պատմաբանի վերլուծական կարծիք ու քաղաքական գնահատական – Վանոյին ԵՐԲԵՔ անձնապես չեմ ճանաչել, ինձ կամ իմ մտերիմներին նա ոչ մի անձնական վատություն չի արել:
